Депутатлар фаолияти

Хонқа туман  Кенгашидаги O`zLiDeP  депутатлик гуруҳи раҳбари Фахриддин Каримов ва  Халқ депутатлари Хонқа туман  Кенгашидаги O`zLiDeP депутатлик гуруҳи аъзолари Нодира Рўзметова ва Фарход Худайбергеновлар Хонқа туманидаги 48-сонли давлат мактабгача таълим ташкилотининг фаолияти билан яқиндан танишдилар.
 Сўнгги йилларда мамлакатимизда мактабгача таълим соҳасини ривожлантиришга алоҳида эътибор қаратилмоқда. Шу мақсадда мактабгача таълим ташкилотлари давлат ва нодавлат тармоғини кенгайтириш, моддий-техника базасини мустаҳкамлаш, уларни малакали педагог кадрлар билан таъминлаш, мактабгача таълим ташкилотларига болаларни қамраб олишни кескин ошириш, таълим-тарбия жараёнларига замонавий таълим дастурлари ва технологияларини татбиқ этиш орқали болаларни ҳар томонлама интеллектуал, маънавий-эстетик, жисмоний ривожлантириш ҳамда уларни мактабга тайёрлаш сифатини тубдан яхшилашга қаратилган бир қатор норматив-ҳуқуқий ҳужжатлар қабул қилинди.
Буларнинг барчаси соҳа ислоҳотларида янги босқични бошлаб берганлиги билан бирга, ёш авлод таълим-тарбияси нақадар долзарб аҳамиятга эга эканини ҳам яққол ифодалайди.
- Мактабгача таълим ташкилотимизда болажонларни ҳар томонлама баркамол этиб тарбиялаш учун барча шароитлар яратилган. Бадиий гимнастика, рақс, инглиз тили, ментал арифметика тугараклари фаолият олиб бормоқда, - дейди мактабгача таълим ташкилоти мудираси, партия фаоли Нилуфар Абдуллаева.-Болажонлар ҳар кунги машғулотларда ўз иқтидорларини намойиш қилиш орқали баркамол, соғлом бўлиб вояга етишларига ўз ҳиссамизни қўшаётганимиздан мамнунмиз.
Учрашув давомида депутатлар томонидан мактабгача таълим ташкилотининг аҳволи, соҳадаги ишларни жадаллаштириш чора-тадбирлари муҳокама қилинди.